Gidaje fiye da 1,300 ne suka lalace a sakamakon wata guguwar iska mai Karfin gaske a karamar hukumar Kafin Hausa.
Kamfanin Dillancin Labarai na Ƙasa, NAN ya bayar da rahoton cewa, lamarin da ya faru a ranar Talata da daddare, ya yi ɓarna sosai.
Mataimaki na musamman ga Gwamna Muhammad Badaru kan ci gaban al’umma da taimakon jama'a, Hamza Muhammad, ya shaida wa NAN a ranar Asabar cewa, sama da gidaje 1,300 ne ibtila'in guguwar ya afkawa, inda wasu su ka rushe gaba ɗaya, wasu kuma su ka lalace.
Muhammad ya ce guguwar ta kuma lalata wasu sassan babban asibitin yankin da matatar ruwa da kuma makarantu.
“Daga rahoton tantancewar da na samu jiya, baya ga wadannan, guguwar ta kuma lalata rufin babban asibitin Kafin Hausa na dakunan haihuwa da na gaggawa da na wasu makarantun yankin.
"Haka kuma ya sauke wasu tankunan ruwa na sama, da kuma daya daga cikin antenar sadarwa a yankin," in ji Muhammad.
Sai dai ya kara da cewa an kai marasa lafiya a dakin haihuwar lafiya zuwa wasu wuraren kiwon lafiya.
Mataimakin ya kuma bayyana cewa, gwamnatin jihar tare da hadin gwiwar hukumar bayar da agajin gaggawa ta jihar, SEMA da kuma hukumar bada agajin gaggawa ta kasa NEMA, sun kasance a yankin tun a ranar Laraba, inda suka tantance irin barnar da bala’in ya yi.
Wannan a cewarsa, domin baiwa gwamnati da hukumomi damar sanin irin barnar da guguwar ta haddasa, da nufin shiga tsakani da kuma bayar da tallafi ga wadanda abin ya shafa.
