Abubuwan Da Ya Kamata Uwa Ta Koyar Da 'Yarta kafin da bayan fara Jinin Haila Na Farko

Farkon jinin al’ada (haila) wani muhimmin lokaci ne a rayuwar kowace yarinya. Wannan lokaci na nuna cewa yarinyar ta fara balaga, kuma jikin ta na fara canjawa zuwa matakin girma da daukar nauyin al’umma. Wannan lokaci na iya zuwa da rudani, tsoro, ko tambayoyi da dama daga yarinyar, musamman idan ba a fara wayar da ita tun kafin hakan ba.

Wannan ne ya sanya wajibi ne ga kowace uwa ta kasance a shirye wajen karɓar wannan canji da kuma jagorantar ’yarta da kulawa, ilimi, da fahimta domin ta girma cikin kwanciyar hankali da tsafta da kuma sanin addini da mutuncinta.

Ga wasu muhimman abubuwa da ya kamata uwa ta koya wa ’yarta lokacin da ta fara jinin haila:

1. Nuna Mata Cewa Wannan Al’ada Ce Ta Balaga

Ki fara da karfafa zuciyar ’yarki da cewa wannan wani mataki ne na rayuwa da duk mata ke fuskantar kansu a ciki. Ki tabbatar da cewa ba cuta ba ce, kuma ba wani abu ne da ya kamata ta ji kunya ko tsoro ba.

Misali:

“Yarinyata, wannan al’ada ce ta mata, alamar girma ce, kuma yana nuna cewa jikin ki yana da lafiya. Ba ke kadai bace, kowace mace ta taba fuskantar hakan.”

2. Koyar Da Ita Tsarkin Jiki da Hanyoyin Tsafta

Yana da matuƙar muhimmanci a koya mata yadda za ta kula da tsaftar jikinta lokacin haila. Wannan yana taimakawa wajen kaucewa kamuwa da cututtuka da kuma jin kunya saboda wari ko datti.

Ki koya mata:

Yadda ake canza pad ko tsumman goge jinin da tsafta.

Lokutan da ya dace ta sauya pad (misali duk bayan awa 3–4).

Wanke jikinta da kyau, musamman bayan jinin ya tsaya.

Amfani da sabulu mai laushi da ruwa wajen tsaftace gabanta.

Guje wa amfani da sinadarai masu ƙamshi a wajen gaba saboda cutarwa.

3. Bayyana Mata Muhimmancin Ibadah Lokacin Haila

Yana da kyau ki fahimtar da ita cewa haila ba laifi ba ce, kuma ba wani abu bane na damuwa da za ta tayar da hankali don bata gudanar da ibada ba.

Ki gaya mata:

Lokacin haila ba a yin sallah ko azumi.

Amma ba laifi ba ne, kuma Allah yana sane da halin da take ciki.

Idan jinin ya tsaya, sai ta yi wankan tsarki sannan ta ci gaba da ibada.

4. Fadakar Da Ita Akan Balaga da Hakkin Ta

Idan mace ta fara haila, to ta balaga. Wannan yana nufin tana da alhakin abubuwan da take aikatawa a addini da rayuwa. Yana da muhimmanci uwa ta bayyana mata wannan hakika.

Ki gaya mata:

Ta riga ta balaga, don haka tana da alhakin sallah, azumi, da sauran ibada.

Ta fara zama cikakkiyar mace da ke da hakki akan jikinta da mutuncinta.

Ta guji yawan hulɗa da maza, ta kiyaye jikinta da kallon sa a matsayin amana.

Kada ta yi wasa da jikinta ko ta shiga tarurruka da ba su dace da mace ba.

5. Nasiha da Kula da Damuwa

Lokacin da yarinya ke shigowa sabuwar duniya ta balaga, tana bukatar ƙarin kulawa da fahimta. A samu lokaci na musamman inda uwa za ta zauna da ita cikin salo na kauna da girmamawa.

Misali:

“Yarinyata, yanzu kin girma. Wannan jini alamar cewa Allah ya saukar da wani nauyi a kanki. Ki kasance mai tsafta, mai mutunci, kuma ki kula da kanki sosai. Idan wani abu ya dameki, kar ki ɓoye, ki zo ki gaya min. Ina tare da ke a koda yaushe, kuma ina kaunarki fiye da yadda kike tunani.”

6. Kare Sirrin Kanta Daga Sauran Mutane

Ya kamata ki koya mata darajar sirri, musamman akan al’amuran jikinta. Ba kowa ne ya dace ya sani lokacin da take haila ba. Hakan zai taimaka mata wajen kame kanta da kuma kauce wa abokai ko yan uwa masu wulakanci ko yawan magana.

Ki gaya mata kada ta bayyana halin da take ciki ga kowa.

Ta sani cewa wannan lamari ne na sirri tsakanin ita da mahaifiyarta ko wasu na kusa da ita da suka dace.

7. Tanadar Mata da Abubuwan Bukata

Ki tanadi kayan da za su taimaka mata wajen tsafta da jin daɗi:

Pad masu kyau da tsafta

Sabulu mai laushi

Tawul ko gyale na musamman

Hijabi da kayan sawa na mutunci masu tsafta da dacewa

Kammalawa

Farkon fara haila wani babba al'amari ne musamman a rayuwar mace. Yana da kyau uwa ta kasance jakadiyar wannan sabon mataki ga ’yarta, ta hanyar ba ta ilimi, kulawa, da kauna. Wannan ba wai kawai zai taimaka mata wajen jin daɗin rayuwa ba ne, zai kuma gina mace mai tsafta, mai sanin addininta da darajarta a cikin al’umma.

Yarinyar da aka fara koya wa sanin darajar kanta tun farkon haila, ita ce mace da za ta tashi da kima da nutsuwa.

Related Posts: