Dakarun Operation Hadin Kai sun ceto wata dalibar makarantar Chibok mai suna Yana Pogu da ke da tagwaye ‘yan watanni hudu da haihuwa a jihar Borno.
An tattaro cewa Pogu ta auri daya daga cikin kwamandojin 'yan ta'addan Boko Haram wanda ya gudu daga harin ya bar matarsa da ‘ya’yansa hudu, kamar yadda jaridar dailypost ta ruwaito.
Dakarun hadin guiwa na Civilian Joint Task Force (CJTF) sun gudanar da aikin ne a ranar Alhamis din da ta gabata bayan da suka kai farmaki a yankin Bula Dawo da ke karamar hukumar Bama a jihar Borno inda suka kashe wasu mahara da ba a tantance adadinsu ba tare da jikkata wasu da dama.
A cewar Zagazola Makama, kwararre a fannin yaki da tada kayar baya, kuma mai sharhi kan harkokin tsaro a tafkin Chadi, sojojin sun yi artabu tare da fatattakar ‘yan ta’addan, tare da kawar da da dama daga cikinsu.
Majiyar ta kuma ce an ceto wasu mata da dama bayan arangamar kuma an kai su Brigade ta 21 da ke Bama domin kula da lafiyarsu.
“A yayin arangamar, sojoji sun yi nasarar ceto Yana Pogu, ‘yar Chibok, wadda ke lamba 19 a jerin ‘yan matan da suka bata tare da ‘ya’yanta hudu,” inji majiyar. “An same ta da wasu tagwaye ‘yan watanni hudu a cikin wani yanayi mara kyau.
Wasu daga cikin maharan da suka tsere ma sun yi yunkurin yi wa dakarun nasu kwanton bauna amma yayin da suke aiki da bayanan sirri, sojojin sun mayar da martani cikin gaggawa da karfin wuta, lamarin da ya tilasta musu tserewa. “An ceto karin mata bayan haduwarsu. An mayar da su Brigade 21 Armored Bama, domin kula da lafiyarsu,” inji shi.
Tun a watan Afrilun 2014 ne mayakan Boko Haram suka yi garkuwa da dalibai mata sama da 200 yawancinsu Kiristoci masu shekaru 16 zuwa 18 a Makarantar Sakandaren ’Yan Mata ta Gwamnati da ke Chibok, Jihar Borno.
