Illolin Sauya Launin Fata (Bleaching)

Me ake nufi da bleaching?

Bleaching ko sauya launin fata na nufin amfani da sinadarai ko mayuka domin rage duhun fata ko sanya ta ta zama fara fiye da yadda take a dabi'ance. Yana faruwa ne saboda wasu suna ganin fata mai duhu ba ta da kyau ko daraja, musamman mata.

Dalilan da ke sa mutane su shiga bleaching:

Tsoron rashin kyau ko rashin kyan fata.

Misali: Wata mace na iya jin cewa idan ba fara ba ce, maza ba za su kula da ita ba.

Tasirin kafafen sada zumunta.

Yanzu ana ganin fararen fata a matsayin ginshikin kyau a fina-finai da Instagram, wanda ke sa mutane suji suna kasa da kima.

Shawarar abokai ko dangi.

Wani lokacin abokai sukan ce “ke me ya hana ki zama fara kamar waccan?” Sai kaga hakan ya sa mace ta shiga bleaching.

Illolin bleaching:

1. Illar Lafiya:

Cututtuka kamar skin cancer (ciwon daji).

Kuraje da tabo masu muni a fuska ko jiki.

Kumburi ko kumburin ido da hakora.

Rashin lafiyar fata (skin thinning) wato fatar na kasa jure rana da hayaki.

Misali: Akwai rahotanni da dama inda mata suka rasa fatarsu, ko kuma sun kamu da matsananciyar cuta sakamakon amfani da sinadaran kamar hydroquinone da mercury.

2. Illar zamantakewa da tunani:

Mutane na iya rasa kwarin gwiwa idan sun gaji da amfani da bleaching.

Maza da yawa yanzu suna gudun masu bleaching saboda yana nuna rashin gaskiya da rashin gamsuwa da yadda Allah ya halicce ki.

3. Illar addini:

Canza halittar Allah sabanin yadda aka halicce ka yana daga cikin abubuwan da shaidan yayi alkawarin cewa zai rudi mutane su aikata.

Hanyoyin gujewa bleaching:

1. Gamsuwa da kanka (self-confidence):

Koyi yarda da kalar fatarki. Allah bai taɓa yin kuskure ba wajen halitta.

2. Gyaran fata da na jiki na halal:

Amfani da sinadarai na halal kamar turaren habba, ruwan lemon tsami, aloe vera, ko man zaitun na taimakawa wajen tsaftace fata ba tare da sauya launi ba.

3. Fahimtar kyawun halayya fiye da kyawun fuska:

Mutum mai hali da tarbiyya yafi daraja a wajen Allah da mutane fiye da wanda ya fito da kyau na waje kawai.

4. Karatun ilimi da wa’azi:

Jin wa’azin malamai da fahimtar matsalolin bleaching zai kara wayar da kai da kuma kareki daga fadawa tarkon shaidan.

Kammalawa:

Kallon farin fata a matsayin alamar kyau ya sabawa dabi'ar addini da hankali. Gaskiya tana nan a cikin yarda da yadda Allah ya halicce mu. Ki zama abin koyi ta hanyar gyara halayyar ki, tsaftace jikinki da zuciyarki, domin kyau na gaskiya yana fitowa daga ciki.

Related Posts: